Hugi Þórðarson

Góða kvöldið

Þrátt fyrir þrálátan orðróm er ég ekki búinn að hengja mig. Ég hef bara haft furðanlega mikið að gera og skammast mín orðið þegar ég lít á vefinn og sé allt sorgmæta fólkið sem kommentar út í tómið. Samviskubitið náði hámarki þegar ég hitti Hildigunni niðri í skóla, en hún kýldi mig beint í andlitið og lét rigna yfir mig skömmum fyrir að blogga ekki, svo ég ákvað að skrifa. Hún veit hvar ég bý.

En ég hef samt ágæta afsökun fyrir þögn síðustu vikna - er búinn að vera að snúast í hringi sökum anna og er kominn með einkarétt á jöfnunni 100% vinna + 100% nám = 200% geðveiki. En lífið gæti samt ekki verið betra þar sem vinnan og píanóið eru hvorttveggja í miklu uppáhaldi hjá mér. Geðveiki er aldrei alslæm.

Við tókum okkur annars til í bandinu mínu um daginn og héldum tónleika á Kringlukránni, spiluðum djass í 2 tíma fyrir pökkuðu húsi. Bandið fékk nafnið "Brennuvargarnir", þar sem tónleikarnir áttu upphaflega að vera á Rosenberg... Við erum voða fyndnir.

Smá hljóðdæmi fyrir þá sem ekki voru á tónleikunum - sökum sjálfhverfu er þetta bara eitt lítið píanósóló (úr gamla Ellington-standardinum "Don't get around much anymore")- en ég hef greinilega verið í miklu hljómastuði þarna, ekkert mikið verið að pæla í línunni...

You must install the Flash Player to watch this movie online.

Fróðleiksmoli: Auglýsingaplakatið fyrir kvöldið heppnaðist ekki betur en svo að ég skartaði mínu fallegasta aulabrosi á myndinni og var þar að auki með opna buxnaklauf - sem ég vakti svo aukaathygli á með höndunum. Allt eftir öðru á þessu heimili.

(Ákveðið breakthrough þegar maður er farinn að skrifa bloggfærslur með stórum hvítum hring utan um kynfærin á sér)

Allt um það - ég byrja að skrifa aftur innan mánaðar. Síðasta prófið mitt er eftir tvær vikur og eftir það hef ég ekkert betra við tímann utan vinnunnar að gera en að skrifa. Það er ekki eins og ég ætli að fara að reyna að eignast líf.

PS: Ég er of latur til þess núna, en á morgun ætla ég að líta á öll ósvöruðu kommentin. Og ég ætla að svara hverju einasta súpermann-tengdu hæðnisskoti.