Að handan

21. janúar 2009

Geir Hilmar Haarde, forsætisráðherra Íslands lést í dag af höfuðmeiðslum eftir að hafa ítrekað gengið á vegg sem reistur var í Alþingishúsinu í gær. Um 70 manns urðu vitni að atburðarásinni sem tók talsverðan tíma og var að sögn í alla staði alveg afskaplega neyðarleg.

Forsætisráðherra var á leið úr þingsal inn í þingflokksherbergi Sjálfstæðisflokks þegar nýreistur steinveggurinn varð á leið hans. Geir sá vegginn vel en gekk samt harkalega á hann, aftur og aftur og aftur. Að sögn lækna hefði venjulegur maður ekki þolað nema tvö til þrjú slík högg á höfuðið en sökum óeðlilega mikillar beinþykktar í höfði forsætisráðherra entist hann í rúma þrjá klukkutíma. "Við skiljum raunar ekki hvernig nokkuð komst nokkurntíman í gegnum svo þykkan beinvef", segir Sigurður Thoroddssen, aðstoðaryfirlæknir á Landspítalanum.

Viðstaddir reyndu að sögn ítrekað að benda Geir á að núna væri veggur þarna og að hann þyrfti að beygja aðeins, en Geir tautaði stöðugt: "Nei. Það er enginn veggur þarna. Það hefur ekkert breyst".

Sjálfstæðisflokkurinn hefur nú náð sambandi við Ódauðlega Sál Geirs með aðstoð miðils og gat hann því setið þingflokksfund skömmu eftir andlátið. Aðspurður eftir fundinn hvort ekki væri ástæða til að boða til kosninga í vor, í ljósi þess að hann væri látinn, svaraði Geir holum rómi: "Nei, ég sé ekki ástæðu til þess. Það hefur ekkert breyst".

Búið er að klæða skrifstofu forsætisráðherra að innan með plasti, en honum fylgir núna talsvert magn af útfrymi.


Tjáskipti

SSkoppur

Ánægður með þig.

baun

en hvernig farnaðist veggnum?

Hugi

Ég er líka ánægður með þig, koppur sæll. Hef alltaf verið það. Baun, fljótlega eftir þetta mætti forstjóri Fjármálaeftirlitsins á staðinn og hengdi á vegginn staðfestingu á að hann hefði staðist álagspróf. Tveimur tímum síðar hrundi veggurinn.

inga hanna

gott að sjálfstæðisflokkurinn er kominn með sambönd við aðra heima - þeir gætu kannski hjálpað fyrst þeir sitja svo fast.

Hugi

Algjörlega. Og mér skilst að þeir séu komnir í virkilega gott samstarf við systurflokk Sjálfstæðisflokksins í neðra. Þessi mynd náðist t.d. í dag af Árna Mathiesen, sem er í starfsnámi í sjöunda hring helvítis - og verður bara sætari með hverjum deginum. {macro:km:picture id="1000565"}

Tjáskiptaðu þínu eigin tjáskipti í tjáskiptin