Prívatið
Fikt
Uppskriftir
- Aðalréttir 53
- Beikon 2
- Brauð og kökur 40
- Dýfur 2
- Eftirréttir 6
- Forréttir 5
- Kreppuuppskriftir 7
- Meðlæti 10
- Sælgæti 2
- Súpur 8
"Pabbi"
27. október 2007
Ég er orðinn "pabbi".
Ég fór í morgun og sótti karl föður minn út á flugvöll en hann er að fara í dag á ástar- og vináttumót hins mikilsvirta "Félags rafeindatæknifræðinga sem starfa við skipaflotann".
Við systa brugðum okkur með karlinn í Smáralindina svo hann gæti fatað sig upp og þar tylltum við okkur inn á veitingastað til að fá okkur að borða.
Í miðri máltíðinni komu tvær stelpur gangandi að mér, svona tólf-þrettán ára. Önnur þeirra leit sakleysislega á mig og sagði hátt: "Pabbi, ertu til í að láta mig fá vasapeninga?".
Það var greinilega eitthvað plott í gangi - kannski sést hvað ég er utan við mig, og þær héldu að ég mundi rétta þeim peninga. Eða kannski átti ég að verða svo hissa að ég léti þær bara fá peninga. En ég er ekki auðhissaður. Ég hinsvegar heyrði kjálkann á pabba detta í gólfið á bakvið mig.
Hugi: "Ekki séns. Þú ert ekki búin að þrífa herbergið þitt eins og þú lofaðir og ættir að skammast þín."
Það kom skelfingarsvipur á stelpurnar og þær hurfu. Og mér gekk ágætlega að sannfæra pabba um að hann þyrfti ekki að bæta þessu splunkunýja áður-óþekkta barnabarni á jólagjafalistann. - En skömmu síðar birtust þær aftur.
Stelpa: "Pabbi, ef þú lætur mig fá peninga þá lofa ég að þrífa herbergið mitt á morgun."
Hugi (byrstur og hávær): "Dóttir sæl. Þú ert ekki búin að slá garðinn, ekki búin að vaska upp þessa vikuna eins og þú lofaðir og þú hefur ekki þrifið herbergið þitt í tvær vikur. Það eru farin að ráfa hungruð bjarndýr fyrir utan það! Ég sé ekki hvers vegna ég ætti að treysta þér fyrir peningum."
Stelpa: "Gerðu það? Bara hundraðkall eða eikkvað?"
Hugi: "Kemur ekki til mála. Farðu og spurðu mömmu þína."
Stelpurnar flissuðu og forðuðu sér.
Hvernig er það, ganga krakkar bara um betlandi í Smáralindinni í dag? Og er "pabbi" orðið eitthvað unglingaslangur yfir óvenju brosmilda og vel tennta unga karlmenn?
Tómt vesen, nú þarf ég að eyða næstu vikum í að sannfæra foreldrana um að borgin sé ekki full af börnum á mínu framfæri. Næst þegar ég fer þarna uppeftir tek ég hrísvöndinn með mér og hýði allt þetta unga fólk.
Tjáskipti
Hugi minn, þetta kemur alltaf í bakið á manni seinna. Þér hefnist fyrir hvað þú varst lausgirtur þegar þú varst 14 ára.
Lenti í þessi líka einu sinni, var þó ekki kennd við móður barnsins en ég var ekki jafn fyndin og þú, spurði bara hvort hún væri geðveik og hvar sjálfsvirðingin væri... O hvað ég vil vera fyndin eins og þú.
ooog svona maður er á lausu? vá...
Ég á æskuvinkonu sem sagði móður sína ætíð hýða sig með hrísvendi, en téður vöndur stóð ávallt í horninu við stigann sem færði mann á efri hæðina. Skemmst frá því að segja að ég var ógurhrædd við þessa móður, sem ku einnig hafa fætt sitt einkabarn á þann hátt að "kúka" henni ofan í klósettið! Ímyndunarafl allra undir 18 er mikið!!!!
hef heyrt um þetta áður og þetta virkar, veit ekki hve mikið en það er verið mikið verið að vera spyrja gamalt fólk um peninga svoa nema það er sagt afi og amma í staðin.
Kolla, ef þú nú bara vissir hversu lausgirtur ég var sem strákur. Ég fór raunar bara einu sinni í buxur á aldrinum 13-18 og núna er haldið árlega upp á þann dag heima í Neskaupstað sem "Buxnadaginn Mikla". Þá er öllum landsmönnum boðið að koma í miðbæinn og máta buxur, en á kvöldin geturðu svo gengið á milli heimila og mátað buxur íbúanna. Hugmyndinni var seinna stolið af ónefndum norðlenskum bæ, þótt útfærslan sé eilítið breytt. Þjófar.
Já, Barbie - var það ekki bara. Þú meinar þá vegna þess hvað þú ert þurrleg og húmorslaus svona dags daglega? ;-) Hvað mig varðar, þá dreymir mig á hverjum degi um að verða úrillur, fúll og alvarlegur. Hlýtur að vera dásamlegt, dásamlegt líf. "spennt": öh - takk? Eða var þetta hæðni - ég kann svo illa á svoleiðis nýmóðins húmor. Ég er altént hamingjusamasti piparsveinn á jörðinni, blóm og kransar vinsamlegast afþakkaðir. Nema þú hafir verið að tala um pabba, en hann er hamingjusamlega giftur til fjörutíu og fimm ára. Kyngimögnuð: Þessi kona hljómar dásamlega, greinilega mikið kjarnakvendi. Ég segi alltaf að það er örugglega betra að láta hýða sig með vendi en að láta afhýða sig með búrhníf. Jónas, áhugavert að heyra. Og súrt - þetta ætti ekki að tíðkast. Afhýða þetta lið.
hehe, tvær góðar. Ætli þetta virki oft?
fólk hérna kann sig ekki. til hamingju Hugi minn. það var stelpa!
*snökt* takk baun, það er gott að vita að það ber þó einhver virðingu fyrir framleiðsluafurðum lenda minna! Ég vona samt bara svo innilega að hún hafi ekki fengið ættgengu meðvitundarþrengslin mín í vöggugjöf. Hildigunnur, ég hef ekki hugmynd - get samt ekki ímyndað mér að þetta virki...
hæðni nei! einlæg aðdáun ;)
Tjáskiptaðu þínu eigin tjáskipti í tjáskiptin